السمنة المفرطة للأطفال
أطفالنا هم أغلى ناس في حياتنا.. دايمًا بنحاول نتجنب الغلطات اللي بتأذي أولادنا نفسيًا وجسديًا..
موضوعنا اللي هنتكلم عليه يعتبر أكبر بوابة للأذى الجسدي والنفسي ممكن طفلك يواجهها، مشكلة السمنة المفرطة للأطفال.
هنوريكوا ايه أسبابها، ازاي نتفاداها وايه علاجها؟
سمنة الأطفال من الحالات الطبية الخطيرة؛ بتعرض الأطفال لمشاكل صحية هتأثر عليهم في السن الصغير وفي المستقبل لما يكبروا.
يا ترى ايه أسباب المرض ده؟
في أسباب كتيرة لسمنة الأطفال، من أهمها :
السلوك الخاطيء في الأكل : دايماً بنسمع كلمة “سيبيه ياكل براحته” او “متحرميهوش من الأكل”.
ده يؤدي أن الطفل ياكل بكميات كبيرة، كمان قلة ممارسة الرياضة والخمول بتزود من وزن الطفل.
- العوامل الوراثية : الطفل بيكون أكثر عرضة لخطر السمنة لما يكون احد الوالدين على الأقل يعاني من السمنة، بس ده مش شرط أساسي إن الطفل هيعاني من السمنة بسبب الجينات.
- الأدوية : زي فواتح الشهية، وأدوية الحساسية والكورتيزون
- الحالات الطبية والهرمونية: زي قصور الغدة الدرقية، ونقص هرمون النمو، متلازمة تيرنر، و متلازمة داون.
ايه المؤشرات اللى تخلينا ناخد بالنا إن الطفل هيكون ضحية وزنه؟
- توزيع الدهون بطريقة غير صحية في الجسم : فبالتالي هنلاحظ أن جسم الطفل مش متناسق
- عدم تقدير الذات : هنلاقي الطفل بيتكسف يروح المدرسة أو يروح التمرين أو حتى إنه يكون متواجد وسط ناس
- اضطرابات الأكل : نلاحظ أن الطفل بياكل في أوقات مختلفة وغير منتظمة في اليوم
- ضيق التنفس عند النشاط البدني: هنلاقي الطفل بينهج من أقل مجهود ومعندوش طاقة
- توقف التنفس أثناء النوم : نلاحظ ان الطفل عنده صعوبة في النوم.
ازاي نعالج زيادة الوزن عند الأطفال؟
لازم نعود الطفل إنه يلتزم بنظام غذائي وعادات صحية، ومن ضمنها :
- تجنب المشروبات الغازية.
- نقلل عدد الوجبات السريعة المليئة بالدهون.
- تجنب تناول الوجبات الغذائية أمام التليفزيون والكمبيوتر عشان ده بيخلي الطفل ياكل كميات كبيرة من الأكل من غير ما يحس و بـ نهم سريع.
- تشجيع الطفل ومكافأته لما يلتزم بالعادات الصحية.
جراحات السمنة تنفع للأطفال؟
في بعض الحالات النظام الغذائي مش بيأدي للنتيجة المرغوبة، زي انه يكون فيه عامل وراثي أو مشكلة هرمونات..
في الحالات دي بنلجأ للجراحات عشان ننقذ الطفل من خطر السمنة.
السن المناسب للطفل عشان يكون جاهز لإجراء جراحات السمنة، هو انه يكون فوق الـ 10 سنين
أهم خطوة قبل ما الطفل يدخل غرفة العمليات أنه يكشف مع اخصائي النفسية والسلوكية قبلها عشان نحدد كويس لو كان مهيأ لجراحة السمنة من الناحية النفسية وكمان لضمان التزامه بالتعليمات والنظام الغذائي بعد الجراحة، وهل هيتعايش مع أسلوب حياته الجديد ولا لأ.
على أساس التحاليل النفسية والسلوكية دي، هنحدد ان كان مهيأ لجراحة السمنة ولا لأ.
ايه دورنا كآباء للحفاظ على صحة الطفل بعد الجراحة ؟
- نقدم للطفل الرعاية والدعم النفسي بعد العملية.
- لازم نحرص على مواظبة الطفل للمتابعة الغذائية بعد الجراحة.
- الاستعداد لتغيير عادات كتير وتغيير نمط الحياة للأحسن بعد الجراحة.
احنا قدوة لأطفالنا، بيقلدونا في نظام أكلنا وحياتنا.. تغيير مسار حياتهم بيبدأ من عندنا ولازم نحميهم من أي ضرر نفسي أو جسدي، في أيدينا نبعدهم عن الأمراض المزمنة ونوفر لهم حياة صحية.
