النظام الصحي في رمضان
رمضان كريم.. في شهر رمضان كل عادات وتوقيتات أكلنا بتتغير بسبب الصيام، ودي بتكون فرصة ممتازة للحالات اللي خضعت لجراحات السمنة أن تستغلها في التخلص من العادات الغير صحية فى الأكل . في عناصر غذائية ضرورية لجسمنا مش بنلحق ناخدها بسبب ان الوقت بين الإفطار والسحور قليل، وكمان بسبب صغر حجم المعدة. عشان كدا في المقالة دي، هنتكلم بالتفصيل عن نظام غذائي مفيد لشهر رمضان هيساعدنا نحافظ على وزننا وكمان ازاي نقدر نستفيد من كل العناصر الغذائية.
امتى نقدر نصوم بعد إجراء جراحة السمنة؟
ممكن نصوم بعد شهر من إجراء العملية بشرط نكون قادرين اننا نشرب 2 لتر على الأقل من السوائل فى الفترة من المغرب إلى الفجر. لو مقدرناش نحافظ وندخل الكمية دي من السوائل يبقى بلاش نصوم علشان ميحصلش أي اعراض جانبية من الصيام زي الجفاف والتعب
ايه المشاكل اللي ممكن تحصل وقت الصيام وازاي نتجنبها؟
أول حاجة الجفاف، وده بسبب ارتفاع درجة حرارة الجو فالجسم بيفقد كمية من سوائل الجسم . وكمان في حالات مش بتلحق تشرب الكمية الكافية من السوائل بسبب ضيق الوقت بين الإفطار والسحور، وبالتالي بتعاني من التعب والجفاف وقت الصيام .. وعلشان نتجنب المشكلة دي، لازم نشرب كمية من 2 ل3 لتر من السوائل في الفترة من الإفطار للسحور.
التعب والارتجاع هما مشاكل بيحصلوا بسبب ان المعدة بتكون فاضية لأكتر من 12 ساعة، فالتسرع في الأكل على الإفطار هيسبب تعب المعدة والشعور بغثيان وارتجاع للأكل. بالتالي لازم نتجنب المشكلة دي بأننا مناكلش على طول وقت الفطار بس نبدأ بقرص من دواء المعدة وبعدها سوائل دافية وبعد كده نقسم وجبتنا.
هل نقدر نمارس الرياضة في شهر رمضان؟ وايه هو أنسب وقت للتمرين؟
طبعًا نقدر نمارس الرياضة في الشهر الكريم، وأنسب وقت هو بعد ساعة و نص أو ساعتين على الأقل من الإفطار، بشرط أن تكون التمارين مناسبة للياقتنا البدنية وكمان بعيدة عن ساعات الصيام والشمس ودرجة الحرارة العليا علشان ميحصلش هبوط أو جفاف للجسم.
ايه انسب نظام غذائى صحى فى الصيام بعد الجراحة ؟
- لازم نكسر صيامنا بتناول دواء المعدة على ربع كوب من الماء الفاتر وبعدها ناخد شوربة قليلة السعرات أو أي مشروب دافي.
- لازم نستنى فترة ما بين نصف ساعة لساعة بعد المغرب وبعدها نتناول وجبة الإفطار، علشان نكون هيأنا المعدة تمامًا لاستقبال الأكل بعد أكتر من 12 ساعة صيام.
- وجبة الإفطار لازم تتضمن كل العناصر الغذائية وبالأخص البروتين.
- لازم نشرب الكمية الكافية من السوائل في المدة بين المغرب والفجر، وهي 2 لتر على الأقل ومينفعش نشرب الكمية دي على مرة واحدة بكمية كبيرة علشان منملاش بطننا.
- لازم ناخد الفيتامينات بعد ساعتين من الإفطار.
- لازم نأخر وجبة السحور لأكتر وقت قريب من أذان الفجر.
- وجبة السحور لازم تكون خفيفة وتتضمن عناصر غذائية، من أهمها البروتين والبوتاسيوم لمنع العطش.
- لازم نستنى ساعة على الأقل من وقت السحور للنوم علشان نسيب فرصة للمعدة انها تهضم.
- حصة الحلويات في رمضان بتكون مرة اسبوعيًا، اما بالنسبة للمشروبات الرمضانية ففي كتير منها بيبقى فيها سكريات عالية وبالتالي المشروبات دي تعتبر حصة من الحلويات
رمضان فرصة مينفعش تفوتها عشان تنزل في الوزن بشكل صحي. والاهم اننا لازم نلتزم بالنظام والتعليمات الغذائية علشان نطلع من رمضان مستفيدين وبصحة جيدة من غير أي أمراض أوأعراض جانبية.
بنفكركم انكم لازم تلتزموا بالمتابعات في رمضان وخصوصا متابعات التغذية سواء في العيادة أو أونلاين عشان لو عندكم أي أسئلة وعشان تحافظوا علي وزكم وصحتكم.
